إسأل أسئلة وإكتشف المسيح
Answers to questions
ينفع الله يكون عنده إبن؟
فعلًا مينفعش لله أن يكون ليه ابن، ده بالمعنى الطبيعي البشري المادي للبنوّة. أمّا إذا فهمنا معنى ابن الله في المفهوم اليهودي، هيتغيّر الموضوع تمامًا. عبارة ابن الله كانت منتشرة جدًا في التراث اليهودي قبل المسيح. ومعناها المُرسل من الله، الحامل لمشيئة الله. ومش ابن بمعنى أنّ الله سبحانه إتجوز وولّد، حاشا لله! ولكن كانت بنوة المسيح ليها طابع مميز، فهو كان الحامل لجوهر الله، بهاء مجده. بيقول الكتاب المقدّس عن المسيح: «الَّذِي، وَهُوَ بَهَاءُ مَجْدِهِ، وَرَسْمُ جَوْهَرِهِ، وَحَامِلٌ كُلَّ الأَشْيَاءِ بِكَلِمَةِ قُدْرَتِهِ، بَعْدَ مَا صَنَعَ بِنَفْسِهِ تَطْهِيرًا لِخَطَايَانَا، جَلَسَ فِي يَمِينِ الْعَظَمَةِ فِي الأَعَالِي،» (عب 1: 3)، «الَّذِي هُوَ صُورَةُ اللهِ غَيْرِ الْمَنْظُورِ، بِكْرُ كُلِّ خَلِيقَةٍ.» (كو 1: 15). فالمسيح هو صورة الله في عالمنا، ده هو معنى ابن الله.
هل وجود ٤ أناجيل يخلينا نشُك في مدى صحته؟
أولاً: كلمة إنجيل مش معناها كتاب. لكن هي "إيفانجيليون", اللي معناها "الخبر السار" وهو حياة الرب يسوع علي أرضنا. تجسّده وتعاليمه ومعجزاته وصلبه وفداءه وقيامته. كل انجيل من الأربعة أناجيل بيوثق شهادة كاتبه عن الخبر السار ده. ووجود شهادات متوثقة من أربع أشخاص, والشهادات ديه فيها كثير من التشابهات, ولكنها مش متطابقة, ومفيش فيها تناقضات,ده بيدل علي أنها بتدي صورة متكاملة الأبعاد علشان تغطي الخبر السار ده.
. وكل واحد من الأربعة كتّاب كتب لهدف ولأشخاص معينين. متي مثلاً كتب لليهود واتكلّم عن المسيح كملك منتظر إتنبأت عنه نبوات كتب العهد القديم.
ومرقس كتب للرومان وإتكلّم عن المسيح كخادم, علشان يخدم البشر.
ولوقا المؤرخ كتب للأمم اليونانيين وركّز علي الطبيعة البشرية المسيح.
وأما يوحنا فكتب لكل العالم عن المسيح في طبيعته الإلهية وأنه الله الكامل الأزلي الأبدي.
الأربع أناجيل مع بعضها تدينا جوانب مختلفة عن الخبر السار ده وهي مش بتتناقض مع بعضها, لكن علي العكس, هي بتكمل بعضها. الأربعة أناجيل من الناحية القانونية, نلاقي فيها إتفاق علي الرغم من تنوع اختيار الكاتب من اضافة أو حذف تفاصيل. وده بيدل علي استقلالية الكتابات وده ادي مصداقية لشهادتهم. علشان كده, فالتنوع في وجهات النظر نظراً للاستقلالية, مع وجود اتفاق في الشهادة بتدل علي أن السجل الكتابي اللي بين أيدينا دقيق وموثوق فيه.